యుద్ధ నేపధ్యం లో సాగిన అద్భుత నవల
----------------------------------
మొదటి ప్రపంచ యుద్ధం మిగిల్చిన మానవ హననం అందరూ ఎరిగినదే..! దాని నేపధ్యం లో అనేక రచనలు వచ్చినప్పటికీ ఎర్నెస్ట్ హెమింగ్వే యొక్క A Farewell to Arms అనే నవల ఒక క్లాసిక్ స్థాయి ని సంతరించుకున్నది.స్వతహా గా అమెరికన్ అయిన హెమింగ్వే స్వయంగా ఈ యుద్ధం లో ఫాల్గొన్నాడు. రెడ్ క్రాస్ సంస్థ నుంచి ఇటలీ లోని యుద్ధ క్షేత్రాల్లో తన సేవలను అంబులెన్స్ డ్రైవర్ గా అందించాడు. ఆ పనిలో ఆయన గాయపడ్డాడు కూడా. ఈ నవల మొత్తం తన అనుభవాల ప్రాతిపదిక గా నిర్మించాడని చెప్పాలి.
దీనిలోని హీరో పాత్ర గా చెప్పదగ్గ Frederic Henry నిజ జీవితం లోని హెమింగ్వే కి దగ్గరగా ఉంటాడు.అతను అమెరికా నుంచి ఇటలీ యుద్ధ క్షేత్రాల్లోకి వచ్చి అంబులెన్స్ డ్రైవర్ గా నే ఉంటాడు.లెఫ్టినెంట్ హోదా లో. అక్కడ ఓ ప్రేమ కధ కూడా సాగుతుంది.ఓ వేపున యుద్ధ భీభత్సం మరో వేపు ప్రణయ గాధ.రెండూ ఒకదానికొకటి అల్లుకుని ఈ రచన ప్రపంచం లోని గొప్ప నవలల్లో ఒకటి గా నిలిచింది.
సరే..ఇపుడు కథ లోకి వెళదాం.ఇటలీ లోని గొర్జియ అనే ప్రదేశానికి అంబులెన్స్ డ్రైవర్ గా ఫ్రెడెరిక్ హెన్రీ వస్తాడు.అక్కడ ఇటలీ సైనికుల పటాలం ఉంటుంది.ఆ దగ్గర లోని కొండ ప్రాంతాల్లో యుద్ధం జరుగుతుంటుంది.ఆస్ట్రియా సైనికులు ఆ ప్రదేశాన్ని వశపరుచుకోవడానికి ప్రయత్నిస్తుంటారు. ఆ సైనిక శిబిరం లో రినాల్డీ అనే ఆర్మీ డాక్టర్ మంచి మిత్రుడవుతాడు.అతని మూలం గా స్థానిక ఆసుపత్రి లో కేథరిన్ అనే నర్స్ పరిచయమై అది ఇరువురి మధ్య ప్రేమ గా మారుతుంది.ఆమె ఇంగ్లండ్ కి చెందిన వ్యక్తి.
యుద్ధ క్షేత్రం లో ఫ్రెడెరిక్ గాయపడతాడు.మెరుగైన వైద్యం కోసం అతడిని మిలన్ లోని ఆసుపత్రి కి తరలిస్తారు.ఆరునెలలు వేచి చూసి ఆ తర్వాత మోకాలు నుంచి కింది దాకా అయిన తీవ్ర గాయానికి ఆపరేషన్ చేద్దాం అంటాడు డాక్టర్.అంత కాలం వేచి ఉండటం ఎందుకు? మోకాలు భాగం నుంచి తీసివేస్తే కృత్రిమ కాలు తో జీవిస్తాను అంటాడు ఫ్రెడెరిక్,సరే లెమ్మని అలాగే చేస్తాడు డాక్టర్.
కేథరిన్ కి ఇక్కడి ఆసుపత్రి కి బదిలీ అవుతుంది,రినాల్డీ ప్రయత్నం వల్ల.ఫ్రెడెరిక్,కేథరిన్ భార్య భర్తల్లా జీవిస్తుంటారు.వివాహం కానప్పటికీ..!మిలన్ లో ఉన్నప్పుడే కేథరిన్ ప్రెగ్నేంట్ అవుతుంది.అదే సమయం లో ఇదే ఆసుపత్రి లో పనిచేసే మిస్ వేన్ కాంపెన్ ఫిర్యాదు చేయడం తో మళ్ళీ యుద్ధ క్షేత్రానికి వెళ్ళవలసి వస్తుంది ఫ్రెడెరిక్.
అక్కడ ఉండే ప్రీస్ట్ గాని ఇతరులు గాని ఫ్రెడెరిక్ లో వచ్చిన మార్పు ని గమనిస్తారు.అతను బైన్సిజా అనే ప్రాంతానికి వెళ్ళినపుడు,జినో అనే వ్యక్తి ద్వారా ఆస్ట్రియ సైనికులు చాలా అధునాతన ఆయుధాల తో దూసుకు వస్తున్నారని కెపోరెట్ అనే ప్రాంతాన్ని వశపరుచుకున్నారని ,అక్కడి ఇటాలియన్ సైనికులు వెనక్కి తగ్గారని తెలుసుకుంటాడు.
ఎంతో ధైర్యవంతుడైన ఫ్రెడెరిక్ , కేథరిన్ విషయం గుర్తు కి వచ్చి భీరువు లా మారిపోతాడు.తనకి సహాయకులు గా పనిచేసే ఇద్దరిని ఇక్కడ నుంచి వెళ్ళిపోవడానికి తనకు సాయపడవలసింది గా కోరుతాడు,వాళ్ళు అంగీకరించకపోవడం తో ఆ ఇద్దరి లో ఒకడిని కాల్చి చంపుతాడు.దానితో ఫ్రెడెరిక్ ని మిలటరీ పోలీస్ బంధిస్తుంది.
మొత్తానికి ఎలాగో చివరకి మిలన్ నగరానికి చేరుకుంటాడు.అక్కడ కేథరిన్ గూర్చి వాకబు చేస్తే ఆమె స్ట్రెస్స అనే ఊరి లో రైల్ స్టేషన్ పక్కనే ఉన్న చిన్న హోటల్ లో ఉందని తెలుసుకొని అక్కడికి వెళతాడు. అక్కడి యుద్ధ విశేషాలు ఏమిటి అని అడిగినపుడు ఆ విషయాన్ని అంటే ఒక వ్యక్తి ని కాల్చి చంపిన విషయాన్ని చెప్పడు. స్విజర్లాండ్ కి వెళ్ళిపోవడానికి ప్రణాళిక రూపొందిస్తారు.
మొత్తానికి ఒక ఓపెరా గాయకుని సహాయం తో స్విజర్లాండ్ కి చేరుకుని అక్కడి పర్వత ప్రాంతం లోని మాంట్రెక్స్ అనే కుగ్రామం లో నివసిస్తూంటారు.కేథరిన్ ఆరోగ్యం దెబ్బతినడం తో లాసెన్ అనే పట్టణం కి చేరుకుంటారు.అక్కడే ఓ ఆసుపత్రి లో మగశిశువు కని కేథరిన్ కన్నుమూస్తుంది.విచారం గా ఫ్రెడెరిక్ హోటల్ కి చేరుకుంటాడు,అప్పుడు భోరున వాన కురుస్తూంటుంది.అదీ స్థూలం గా కధ.ఈ నవల లో తరచి చూసినట్లయితే వాన అనే అంశాన్ని చాలా సింబాలిక్ గా వాడుకున్నాడు రచయిత.అది మాత్రమే గాక వాతావరణాన్ని అది మారే తీరు తెన్నుల్ని సైతం సన్నివేశాలు బలపడటానికి హృద్యం గా వాడుకున్నాడు.
రాత్రి పూట బ్యారక్స్ లో నిద్రించుతున్నప్పుడు వాన కురియడం అంతలోనే శత్రు సేనల మోర్టార్లు దూసుకురావడం,బాంబుల శబ్దాలు,నిద్ర మధ్య లోనే లేచి తయారవడం ఇలాంటివి అన్నీ సైనిక జీవితం లోని మరో వైపు ని చూపిస్తాయి. యుద్ధ క్షేత్రాల్లోని భీభత్సాన్ని కూడా మనకి చాలా దగ్గరగా తీసుకువస్తాడు.పాసిని అనే సైనికుడు మోర్టార్ గాయం తో బాధ పడుతూ తనని కాల్చి చంపవలసిందిగా ఫ్రెడెరిక్ ని అర్ధించడం మచ్చుకి ఒకటి గా చెప్పవచ్చు.Dio te salve Maria (మేరీ మాతా,విముక్తి కలిగించు) అని రోదించడం హృదయవిదారకం గా అనిపిస్తుంది.
ఇంకా విశేషం ఏమిటంటే యుద్ధ క్షేత్రాల్లో ఒక దేశపు అధ్యక్షుని యొక్క కొడుకు,ఉన్నతాధికారుల సంతానం కూడా తమ సేవల్ని అందించడం ఈ నవల లో చూడవచ్చు.నిజ జీవితం లో కూడా యూరపు లోని రాజవంశీకులు యుద్ధం వచ్చినపుడు పైలట్లుగా,డ్రైవర్ లుగా,సైనికులు గా తమ సేవల్ని అందించడం ఒక గౌరవనీయమైన అంశం గా భావిస్తారు.
ఈ నవల 1929 లో ప్రచురించబడినపుడు గొప్ప ఆదరణ ని చూరగొన్నది.మొదటి ప్రపంచ యుద్ధం నేపధ్యం లో వచ్చిన అత్యుత్తమ నవల గా కొనియాడబడింది.1930 లో నాటకం గా ప్రదర్శింపబడింది.ఆ తర్వాత 1932 లోనూ 1957 లోనూ సినిమా రూపం లో వచ్చింది.అయితే దీని ఇటాలియన్ అనువాదం 1948 దాకా రాలేదు,కారణం ఆ తర్వాత అధికారం లోకి వచ్చిన ఫాసిస్ట్ నియంత బెనిటో ముస్సోలిని.ఇటలీ ని కించబరిచే కొన్ని విషయాలు ఉన్నాయని, అలాగే పాత్రికేయుని గా హెమింగ్వే తనని గురించి అవాకులు చవాకులు రాశాడని ముస్సోలిని భావించాడు. ఏది ఏమైనప్పటికీ ఆంగ్ల నవలా సాహిత్యం లో వెలువడిన గొప్ప రచన గా దీని స్థాయి ఎప్పటికీ నిలిచి ఉంటుంది.
-----మూర్తి కెవివిఎస్ (చరవాణి: 7893541003)
(Published in Nava Telengana (Daily), 5.10.2020)
No comments:
Post a Comment