RORSCHACH ...ఈ స్పెల్లింగ్ ని ఎలా ఉచ్ఛరించాలి

 RORSCHACH ...ఈ స్పెల్లింగ్ ని చూడగానే ఎలా ఉచ్ఛరించాలి అని కాసేపు ఆలోచన రావడం సహజమే. దీన్ని రోర్షాక్ అని అనాలి. ఒక స్విస్ శాస్త్రవేత్త యొక్క సర్ నేం. 1921 నుంచి ఈ పేరు మానసికశాస్త్రం తో పరిచయం ఉన్నవారికి ఎక్కడో తగులుతుంది. రోర్షాక్ సైకలాజికల్ టెస్ట్ అనేది కొన్ని రకాల మానసిక రోగులపై జరుపుతారు.పది తెల్లని కార్డుల్ని తీసుకుని వాటి మీద ఇంక్ ని ఇష్టం వచ్చినట్లు చల్లుతారు. ఆ కార్డుల్ని రోగి కి చూపించి వాటిల్లో తనకి ఎలాంటి ఆకారాలు కనిపిస్తున్నాయి. తన మెదడులో ఏ ఊహలు వస్తున్నాయి అనేది ఎలాంటి దాపరికాలు లేకుండా చెప్పమని అడుగుతారు. ఈ ప్రక్రియ ని హెర్మన్ రోర్షాక్ మొదలుపెట్టడం వల్ల దీనికి ఆయన పేరునే పెట్టారన్నమాట.

ఇదంతా ఎందుకు చెబుతున్నానంటే రెండురోజుల క్రితం ఓ మళయాళ సినిమా చూశాను.దానిపేరు రోర్షాక్. మమ్ముట్టి హీరో. 2022 లో విడుదల అయ్యి ప్రేక్షకుల ఆదరణ పొంది మంచి విజయమే సొంతం చేసుకుంది. అసలు ఇలాంటి ఒక టైటిల్ ని మనం తెలుగు లో ఊహించగలమా? కథ విన్నూత్నమైన విధానం లో సాగుతుంది. నిసాం బషీర్ దర్శకుడు.ఒక సైకలాజికల్ థ్రిల్లర్ అని చెప్పాలి. మమ్ముట్టి గాని,మోహన్ లాల్ గాని..అగ్ర హీరోలు కూడా సినిమాల్లో ప్రయోగాలు చేయడానికి వెనుకాడరు.

అందుకే మళయాళం లో తక్కువ బడ్జెట్ తో వెరైటీ సినిమాలు వస్తాయి. ఈ ఓటిటి ల పుణ్యమా అని అవన్నీ చూస్తుంటే అక్కడి ఆడియన్స్ యొక్క పరిణితి కూడా అర్థమవుతుంది. సినిమా కథ రివెంజ్ కి సంభందించినదే అయినప్పటికి తీసిన విధానం చివరి దాకా కూర్చోబెడుతుంది. లూక్ ఆంటోనీ అనే దుబాయ్ లో ఉండే వ్యాపారి కేరళ లోని చలకుడి సమీపం లోని చిన్న గ్రామం లో ఓ ఇల్లు కొని ఒంటరిగా ఉంటూంటాడు. అది ఊరికి దూరంగా ఉంటుంది.తన భార్య సోఫి ఆక్సిడెంట్ లో మరణించినట్లు స్టేషన్ లో కంప్లైంట్ ఇస్తాడు.

బాలన్ అనే వ్యక్తి కి సంభందించిన కుటుంబం లో విచిత్రమైన సంఘటనలు జరుగుతుంటాయి. వాటి వెనుక లూక్ ఆంటోనీ ఉన్నాడనే అనుమానం ఎక్కడా రాదు, ఒక్కొక్క ముడి చివరికి విప్పుతూ సినిమా ఆఖరికి వచ్చేసరికి ఆశ్చర్యపోతాము.కళ్ళకి ఇంపైన పచ్చని ప్రకృతి ...ఆ ఊరిలో దృశ్యాలు బాగున్నాయి.పూర్తిగా కథ చెబితే బాగుండదు. ఈ సినిమాని వీలైతే చూడండి,చక్కని రోటీన్ కి భిన్నం గా ఉన్న సినిమా చూసిన  అనుభూతి కలుగుతుంది.  Available on JioHotstar.

పింటూ మహతో అనే బీహార్ గ్యాంగ్ స్టార్ గురించి

 ఇటీవల ఖాకీ: బీహార్ ఫైల్స్ అనే వెబ్ సిరీస్ చూడటం జరిగింది.ఇది నాలుగేళ్ళ క్రితం నెట్ ఫ్లిక్స్ లో రిలీజ్ అయినప్పటికీ నేను కాస్తా ఆలశ్యం గా చూశాను.ఎలాంటి అంచనాలు లేకుండా చూడటం మొదలుపెట్టి మొత్తం ఏడు ఎపిసోడ్ లు అయిపొయేసరికి ఒక మంచి అనుభూతి కలిగింది.

ఒకానొక కాలం లో మనం పింటూ మహతో అనే బీహార్ గ్యాంగ్ స్టార్ గురించి చదివేవాళ్ళం.దోపిడీలు,కిడ్నాప్ లు,జైలు సిబ్బంది ని ఏమర్చి పారిపోవడం ఇవన్నీ మళ్ళీ మెదిలాయి. ఈ కథ అంతా కూడా మహతో ని ఆధారంగా చేసుకొని సాగినదే! 

అమిత్ లోధా అనే ఐపిఎస్ అధికారి రాసిన ఒక పుస్తకం నుంచి తీసుకున్నది.రాజస్థాన్ నుంచి ఒక యువ ఐపిఎస్ అధికారి రైలు లో వస్తుంటాడు. బీహార్ లో ని ఒక జిల్లా లో జాయిన్ కావడానికి. ఆ రైల్లోనే కొంతమంది ప్రయాణీకులు ఇతడిని చూసి జోక్ లు వేసుకుంటూంటారు.పోలీస్ అధికారి మామూలు డ్రెస్ లో ఉంటాడు.ఏమీ అనకుండా నిశ్శబ్దం గా చూసి ఊరుకుంటాడు.

కాసేపయిన తర్వాత వాళ్ళ ప్రశ్న కి జవాబు చెబుతాడు,తాను కొత్తగా బీహార్ కి కేటాయించబడిన ఐపిఎస్ అధికారినని...అవతలి వాళ్ళు ఖంగు తిని సారీ చెబుతారు. అంతేగాక సగటు బీహారి తత్వాన్ని వివరిస్తారు. నేను..అని కాకుండా మనం..అని మీరు ఎప్పుడైతే బీహారి వ్యక్తి తో మెలుగుతారో అతను మీతో ఎప్పటికీ స్నేహంగా ఉంటాడు.

 మాది బుద్ధుడు నడిచిన భూమి,మహావీరుడు నడిచిన భూమి. వెళ్ళండి మీకు తెలుస్తుంది అంటారు. ఈ యువ అధికారి పేరు అమిత్ లోధా. ఈయన జాయినింగ్  రిపోర్ట్ ఇవ్వడానికి ఆఫీస్ కి వెళతాడు. అక్కడ ఒక చెట్టు కింద తలపాగా చుట్టుకొని కుర్చీలో కూర్చుని వచ్చిన జనాలతో జోక్ లు వేసుకుంటూ ఒక మనిషి కనబడతాడు.

లోపల ఆఫీస్ లో ఎవరూ కనిపించరు. అక్కడ అలా వెయిట్ చేసిన తర్వాత,ఆ తలపాగా వ్యక్తి వచ్చి నేనే నీ సుపీరియర్ ని అని చెప్పి జాయినింగ్ రిపోర్ట్ తీసుకుంటాడు. అమిత్ లోధా కి మతి పోతుంది. 

పింటూ మహతో పేరు ని చందన్ మహతో అని మార్చారు. చిన్న సైజు కూలీ, లారీ డ్రైవర్ గా పనిచేసే మహతో రకరకాల అనుభవాల ద్వారా గ్యాగ్ స్టర్ గా ఎదుగుతాడు.చదువు పెద్దగా లేకపొయినప్పటికీ ఇతరుల్ని మాటలతో బురుడీ కొట్టించే కళ బాగా ఉంటుంది.ఇతనికి చ్యవన్ ప్రాశ్ సాహు అనే మరో వ్యక్తి జైలులో పరిచయం అవుతాడు.

ఇద్దరూ కలిసి జైలు నుంచి పారిపోతారు. ముగ్గురు జైలు సిబ్బంది ని హత్య చేసి బయటకి వచ్చిన వీళ్ళు తమ సామాజిక వర్గానికి చెందిన యువత ని తమ మాటలతో ఆకట్టుకొని కిడ్నాప్ లు,లూటీలు చేస్తుంటారు. వీళ్ళు దోచుకునేది ఎక్కువగా మార్వాడి వ్యాపారస్తుల్ని,ఇతర సంపన్నుల్ని.అమిత్ లోధా మార్వాడి వ్యాపారస్తులకి ఏ ఒక్కరికీ డబ్బులు ఇవ్వొద్దని ధైర్యం చెబుతాడు.దాంతో నెల మామూళ్ళు ఆగిపోతాయి.చందన్ మహతో ఫోన్ ని ట్రాక్ చేసి అతడి అనుచరుల్ని అరెస్ట్ చేయడం మొదలుపెడతాడు.

మహతో ,వెనుకబడిన వర్గాల కి ఎన్నికల్లో సపోర్ట్ చేస్తూ పొలిటికల్ బేస్ ని నిర్మించుకుని పోలీస్ ల నుంచి తప్పించుకుంటూ తన కార్యకలాపాల్ని కొనసాగిస్తుంటాడు.బీహార్ కుల రాజకీయాలు అంతటా ఎలా పెనవేసుకుని ఎలా ఉంటాయో దర్శకుడు బాగా ఎలివేట్ చేశాడు. 

అయిదుగురు యాదవ్ ల్ని హత్య చేసి జైలు కి వచ్చిన మహతో ని రాజ్ పుత్ వర్గం అభిమానంగా చూస్తారు. తనకు నమ్మక ద్రోహం చేసిన అభ్యుదయ్ సింగ్ అనే రాజ్ పుత్ ని చంపడం తో వాళ్ళు ఇతడికి వ్యతిరేకం అవుతారు. రాష్ట్ర రాజకీయాల్లో మహతో కీలకంగా మారడం తో అతడిని మట్టుబెట్టడానికి అనేక ప్రయత్నాలు జరుగుతుంటాయి. 

బీహార్ సామాజిక కోణాన్ని ,గ్రామీణ వ్యవస్థని,పేదరికానికి గల కారణాల్ని చక్కటి కథ గా మన ముందు దర్శనమిస్తుంది. పోలీస్ అధికారుల్ని నియమించడం లో జరిగే నేపథ్యాన్ని  ఈ వెబ్ సిరీస్ లో కళ్ళకి కట్టినట్లు చూపించాడు. 

ఫోటోగ్రఫీ హాయిగా ఉంది. బీహార్ గ్రామ సీమలు,చుట్టుపక్కలున్న అడవులు అందంగా ఉన్నాయి.మహతో గా నటించిన అవినాష్ తివారి, అమిత్ లోధా గా నటించిన కరణ్ టక్కర్ లు మన మనసులో చాలా కాలం నిలిచిపోతారు.వీలైతే చూడండి.నేను చెప్పింది తక్కువ,గ్రహించడానికి చాలా ఉంది. నిజ జీవితం లో మహతో 300 మందిని చంపినట్లుగా రికార్డులు చెబుతుండగా,దాంటో 30 మంది పోలీసులు. అదీ కొసమెరుపు. 

ఆత్మల తో కొందరి రచయితల అనుభవాలు

 ఇప్పుడే "నీలివెలిచం"(Blue radiance) అనే మళయాళ చిత్రాన్ని అమెజాన్ ప్రైం లో చూశాను. ఇది వైకోం ముహమ్మద్ బషీర్ యొక్క కథ.ఇంతకు ముందు ఈ సినిమాని అయిదు దశాబ్దాల కిందట తీసినప్పటికీ మళ్ళీ ఈ ఏడాది లో తీశారు. కథ అతీంద్రియ ఆత్మ ఇంకా అలాంటి జోనర్ గా చెప్పవచ్చు.సినిమా ఆసక్తి గా సాగింది.చనిపోయిన ఓ యువతి ప్రేతాత్మ, నివసించే పాడుబడ్డ భవనం లోకి ఓ రచయిత వచ్చినపుడు తారసపడిన అనుభవాలే ఈ కథ.

ఆనాటి మపాసా నుంచి మొన్నటి బషీర్ ఇంకా నిన్నటి ఆర్.కె.నారాయణ్ వరకు ప్రసిద్ధ రచయితలు చాలామంది కొన్ని అతీంద్రియ అనుభవాల్ని పొందినవారే.వాటిని వివిధ కధల్ని పొదిగిన వారే.కొంతమంది లోకం దృష్టిలో పల్చనవుతాం అని వేరే వాళ్ళ అనుభవాలుగా వర్ణిస్తే మరికొందరు తమ కోసం రాసుకున్నారు.అవి ఆ తర్వాత బాగా ప్రసిద్ది పొందాయి. 

Le Horla ఇంకా Qui sait? వంటి ఫ్రెంచ్ కథల్లో మపాసా చిత్రించిన Supernatural phenomena తను పొందిన అనుభవాలుగానే చెప్పాడు.అలాగే ఆర్.కె.నారాయణ్ కూడా The English Teacher నవల లో చనిపోయిన భార్య ఆత్మ తో మాట్లాడటానికి చేసిన ప్రయోగాలు చదివాము గదా.నారాయణ్ నిజజీవితం లో కూడా ఈ ప్రయోగాలు చేశాడు.ఆయన కి దగ్గరగా ఉన్నవాళ్ళు ఈ విషయం అనేక వ్యాసాల్లో రాశారు.

అలానే ఈ మళయాళ సినిమా మొదట్లో బషీర్ గారి మాటలు ఇంగ్లీష్ లో ఇలా వేశారు. "నా జీవితం లో పొందిన కొన్ని అంతుతెలియని అనుభవాల్లో ఇది ఒకటి. దీన్ని ఒక బుడగ అని భావిస్తే ,హేతుదృష్టి అనే సూది తో దాన్ని పగలగొట్టాలని ప్రయత్నించి విఫలమయ్యాను.మీరూ ప్రయత్నించి చూడండి ".      

----- Murthy kvvs

"జెర్సీ" సినిమా గురించి రెండు మాటలు..!

ఎంతో బాగుంది అని టాక్ వస్తేనో,ఎవరైనా ఒక సినిమా గురించి ప్రత్యేకంగా ప్రస్తావిస్తేనో ఈ మధ్య కాలం లో సినిమాలు చూడటం జరుగుతోంది.అదీ ఒక్కోసారి కుదరటలేదు కూడా ..పెద్ద రిగ్రెట్స్ కూడా ఉండవనుకోండి.ఇటీవలనే కొన్ని రోజుల క్రితం ఈ జెర్సీ అనే సినిమా ని చూడటం జరిగింది.ఈ సినిమా ముందుకు పోతున్న కొద్దీ ఒక నవల చదివిన చందం గా అనిపించసాగింది.కొన్ని చోట్ల బోరు గా ,బోలు గా ఉండి మళ్ళీ అంత లోనే ప్రేక్షకుడి ని కదిలిస్తూ సాగిపోయింది.కొన్ని హృదయాన్ని కదిలించే సన్నివేశాలు చక్కగా చిత్రీకరించారు.మొత్తం గా చెప్పాలంటే ఇది దర్శకుని సినిమా...ఆ తర్వాత అందరిదీ.

సెంట్రల్ పాయింట్ చెప్పాలంటే అన్ కండిషనల్ లవ్ అనేది మనుషులను ఏ విధంగా ఉత్తేజపరుస్తుంది ,ఏ త్యాగానికైనా ఎలా ప్రేరేపిస్తుంది అనేది అంతర్లీనంగా చెప్పబడింది.కొడుకు ని కోపం తోనూ నిష్కారణం గా తన మీద తనకి వచ్చే ఉక్రోషం తోనూ కొట్టినప్పటికీ ,ఇంకా ప్రపంచం తనని చూసే వైనం తెలిసినప్పటికీ వాటితో సంబంధం లేకుండా ఆ చిన్న హృదయం తనపై చూపే ప్రేమ హీరో ని కదిలించడం అనేది చూసేవారిని కదిలింపచేస్తుంది.ఉద్యోగం పోయి ఇలాంటి బాధల్ని అనుభవిస్తూ బయటకి చెప్పుకోలేని స్థితి లో ఉండే వారిని మనం నిజజీవితం లో ఎంతో మందిని చూస్తాము.ఒక చిన్న మొత్తం కోసం ప్రపంచం మొత్తాన్ని దేబిరించినా దొరకని రోజులు ఉంటాయి.ఎత్తు పల్లాలు ఎంత వారికీ సహజం.వాటిని అన్నిటిని అర్ధం చేసుకొని సినిమా గా అనువాదం చేయడం గొప్ప విషయం.

కొన్ని సీన్లు కన్నీళ్ళు తెప్పించేవి గానూ ఉన్నాయి.ఈ మధ్య కాలం లో ఈ తరహా చిత్రం ఇదే అని చెప్పవచ్చు.జెర్సీ కొనడానికి 500 కోసం చేసే ప్రయత్నం,తన ఉద్వేగాన్ని వ్యక్తం చేయడానికి కదులుతున్న రైలు సౌండ్ ని ఎంచుకోవడం,తన పేరు లిస్ట్ లో చూసుకోడానికి కూడా భయపడుతూ దూరం గా నిలబడిపోవడం,అంతలోనే ఇంకో వ్యక్తి ఇతడిని చూసి చిన్నగా నవ్వడం ,అప్పుడు చూసుకోవడం ఇలా ఇంకా కొన్ని సన్నివేశాలు ఎంతో చక్కగా ఉండి అలరిస్తాయి.అయితే కొన్ని చోట్ల మరీ నసిగినట్లుగాను,ఏ భావం లేనట్లు గా ఉండడం ..అవసరమైన చోట కూడా ...అలా పాత్రలు బిహేవ్ చేయడం అసంతృప్తి గా అనిపించినా అవి పెద్ద గా నిరాశ పరచవు ప్రేక్షకుడిని.ఈ టైప్ దాన్ని అండర్ ప్లే అంటారు గాని కొన్ని సార్లు అది ఓకే.

సత్యరాజ్ కి ఇంకా చిన్న కుర్రాడు రోనీ కి ఎక్కువ మార్కులు వేశాను.ఆ పిమ్మట నాని,హీరోయిన్ శ్రద్ధ కి.ఇక మిగతా క్రూ ఓ.కె.నన్ను చెప్పమంటే ఏ కొత్తవాళ్ళు దీంట్లో హీరో హీరోయిన్ లు గా నటించినా సినిమా ఇదే విధంగా హిట్ అయి ఉండవచ్చు.కొత్తవాళ్ళు అయితే టాక్ బయటకి రావడానికి కొద్ది సమయం పట్టేది.అది వేరే విషయం.చాన్నాళ్ళకి మెదడు ఒక్కదానితోనే కాక హృదయం తో కూడా ఆలోచించి తీసిన సినిమా గా అనిపిస్తుంది.ఒక వెంటాడే సినిమా ని చూసిన తర్వాత ,ఆ సినిమా చూసి వస్తూంటే మనసు  లోపల అంతా ఖాళీ అయి నిశబ్దం అయిన అనుభూతి కలుగుతుంది.జెర్సీ కూడా అటువంటిదే.తెలుగు సినీ చరిత్ర లో ఆణిముత్యాల వంటి సినిమాల్లో ఇది ఒకటి గా నిలిచిపోతుంది.